政情：潮商會90周年大搞作
雲集富豪嘅香港潮州商會，今年喜事多籮籮，九十歲生日在望，商會搞搞新意思，破例將新一屆會董就職禮提早搞，下周四（十六日）喺會展筵開逾百圍，順便宣布九十周年慶典活動正式揭幕。
潮州商會會長陳幼南（Ian）尋日向傳媒預告嚟緊搞作多，下周嘅就職晚宴，將變身潮州之夜，唔止請賓客品嘗特色「潮菜」，仲有氣勢磅嘅潮汕大鑼鼓表演。潮州人原來好重視「成人禮」，稱之為「出花園」，來自揭陽嘅舞蹈團將以跳舞方式展現傳統習俗，新鮮感十足。
壓軸節目係美女模特兒着婚紗及晚裝行貓步，原來潮州有「中國婚紗之都」美譽，唔少出口歐美嘅婚紗，都係「潮州製造」。透過連串表演，Ian話想令人感受到潮州商會嘅「潮」味，一啲都唔老餅喎。
不過，晚宴只係開端，商會正籌劃舉行金融經濟論壇，將邀請中港猛人「開壇」分析市況，仲會舉行攝影比賽添。一句講晒，精彩節目一浪接一浪，難怪Ian話，近排腦筋轉不停，忙到周身唔得閒。