政情：田二少退黨大佬好做
自由黨最近多災多難，先有常委田北辰退黨後即與匯賢智庫「談婚論嫁」，後有西貢區議員方國珊想辭職唔做支部主席，直選之路風雨滿途。留下來嘅艱難，走咗嘅就不知幾風騷，田二少尋日出席一個晚宴時笑容滿面，仲話同匯賢嘅葉劉淑儀初步接觸後，大家感覺都唔錯。對於外界覺得佢哋兩個性格剛烈嘅人未必合得來，二少就好阿Ｑ咁話，從來冇聽過有人唔睇好佢同葉劉埋班，又話只要大家feel good、理念相同就冇有怕喎！
田二少退黨之後，撰文力數自由黨四宗罪，不過佢尋日對匯賢智庫就有讚冇彈，話覺得葉劉嘅團隊學歷高、好有理想、理念又清晰，依家積極探討緊組黨可能性，好多嘢仲傾到具體細節添。二少蟬過別枝，驚唔驚大哥田北俊嬲先？田二少話無論退黨定組黨，事前都有知會大佬，所以兩個都唔會因為呢啲事而唔開心，仲話退黨對大佬嚟講係好事，因為少咗摩擦，唔使大佬「手掌又係肉、手背又係肉」唔知點算喎。