政情：EQ港大碩士得來不易
依家人人都話要終身學習，民建聯新星、區議員葛珮帆（EQ）都不甘後人，本身已經有工商管理博士學位嘅佢，尋日再度行畢業禮，不過今次係喺香港大學讀嘅婚姻與家庭治療。唔講唔知，EQ呢個碩士學位差啲凍過水，因為佢三年前忙住區選，當選後又要做地區工作，最後三年課程拖到極限六年先畢業，差啲畢唔到業。
EQ話以前有個社署社工提過佢，未來香港應該會有好多婚姻問題，佢一直都諗住再進修充實自己，六年前就毅然報讀婚姻與家庭治療課程，希望第日幫到市民。不過呢個碩士一啲都唔易讀，一嚟佢以前從來無接觸過心理學，要由零開始，讀得好吃力；再加上呢個課程除咗做功課同寫論文，仲要做五百個鐘實習，對又要返工又要參選嘅佢係好大負擔。
當EQ好不容易捱晒所有實習鐘數，但未交畢業論文就要瞓身預備區議會選舉，所以論文拖到大學向佢發出最後通牒先開始寫，好彩最後交得切功課，否則之前嗰五百個鐘就前功盡廢啦！