政情：陳慧慧發聲明撐老竇
南豐集團主席陳廷驊家族內訌，陳廷驊幼女陳慧慧與母親對簿公堂，忙於應付官司嘅佢，心情似乎冇受影響，喺剛過去嘅周日，繼續做善事。不過陳慧慧尋日發表聲明，表示對家族事件被帶上法庭及公開報道，感到十分遺憾。
港安醫院慈善基金會日前舉行「小小英雄‧音樂顯愛心」慈善音樂會，陳慧慧以陳廷驊基金會主席名義現身支持，該基金更特別捐助「港安醫院慈善基金」轄下嘅「港安幼苗心臟基金」，讓患有先天性心臟病小朋友盡快接受治療。
望給予私隱尊重
捐錢之外，陳慧慧絕口不提家族事，直至尋日終於發聲明表露心聲。佢重申今次事件乃家庭私人事務，與集團日常業務運作無關；希望各界喺佢哋呢個困難時期，給予佢爸爸多點私隱同尊重。
陳慧慧指爸爸曾出任多項社會公職，七○年成立陳廷驊基金會，大力支持各種慈善服務，非常遺憾嘅係，爸爸後來患上腦退化症，二○○八年底正式退出集團工作。陳慧慧仲強調，喺爸爸退休前，佢哋一直緊密攜手工作，兩父女共同開拓業務。
陳慧慧仲話，對今次事件被帶上法庭及公開報道感到十分遺憾，佢會致力解決一切問題，懇請各界畀佢爸爸保留多一點私隱。至於佢如何致力解決問題，聲明就冇詳細闡釋。