政情：工聯內外夾擊胡紅玉
積金局主席胡紅玉去年三月上任至今，做足一年半「深閨」主席，即使強積金「半自由行」急煞車咁大件事，佢都身居幕後，只由行政總監陳唐芷菁解畫擋箭。不過，身為弱勢政府嘅半官方機構舵手，點可以「深居簡出」咁舒服？尤其未來兩年仲係選舉年添！工聯會將會出招，要求千瘡百孔嘅強積金制度進行連串手術，該會兩名議員葉偉明同身兼積金局董事嘅黃國健（KK），決定內外夾擊積金局，胡紅玉嘅積金局「宅女」生涯睇嚟好快畫上句號。
葉偉明身受其害
○八年底金融海嘯爆發，股市急瀉，全港打工仔強積金戶口大蒸發，葉偉明份強積金結算更加驚心動魄，事關佢嘅投資組合屬「超級進取型」，本地股票同大中華股票各佔一半，損手程度可想而知，直至兩個月前先至勉強收復失地。投資可升可跌，風險自負，強積金戶口最令佢心寒嘅，係佢睇咗大半日，都唔知中介人收咗佢幾多管理費，等如打開荷包任人魚肉，佢相信好多人同佢有一樣感受。
積金局最快今年底會就規管銷售強積金中介人推出諮詢文件，目標係趕及明年提交立法會審議。有切膚之痛嘅葉偉明話，由佢擔任副主任嘅工聯會轄下權益委員會，將會要求現時「四不像」嘅強積金進行連串改革，第一炮就係要求為中介人收取管理費「封頂」同增加透明度，佢會約見胡紅玉，嚟個短兵相接，先禮後兵，而KK就喺積金局內力陳利害，胡紅玉今次肯定無得匿。
據聞，胡紅玉上任一年半以嚟，相當「深閨」，可能諗住KK係積金局董事，工聯會副會長梁富華係積金局諮詢委員會委員，搭通天地線，所以至今未約過工聯會另外三位立法會議員，即葉偉明、王國興同潘佩璆見面交流。有勞工界中人笑言，勞工處處長卓永興剛上任，已約好下星期落土瓜灣拜訪工聯會，新官上任先拜山頭，相比之下，胡紅玉就唔多識做嘞，無乜誠意溝通。
其實工聯會向胡紅玉下戰書，早有先兆。工聯早前開記者會炮轟強積金五宗罪，點知積金局按慣例向各董事發內部通知，要求對外統一口徑，以「有關批評之前已有人提過」不予回應，言語間暗寸工聯會嘅批評無乜新意，KK收到，啼笑皆非，一笑置之。不過，隨着區議會選舉臨近，下次工聯會同胡紅玉過招，唔會再手下留情，胡紅玉要打醒精神嘞。