中環出更：蔡冠深擴張中總版圖
中華總商會會長蔡冠深早前再次冧莊做第二任期會長，佢嘅滿腹發展大計有多兩年時間實現。早前中總連續十一年舉行領事酒會，共有四十幾個國家近六十位駐港總領事同商會代表出席，參加與中總一年一度嘅約會，粒粒星級嘉賓逼爆會場，好熱鬧。呢個酒會係中總發揮「立足香港、背靠祖國、聯繫世界」嘅傳統節目，不過咁仲未夠，蔡會長仲想做多啲喎！
蔡會長話畀我哋聽，佢哋正積極吸納跨國公司、海外企業同內地企業成為聯席會員，擴大現有嘅會員網絡。即使外國商會組織想入會都唔拘㗎！事關曾經有外國商會想參加中總嘅內地訪問團北上尋覓商機，但礙於佢哋唔係中總會員，所以未能成事。可見中總咁多年嚟與內地建立嘅緊密關係，已成為佢哋嘅優勢。
當日外交部駐港副特派員高玉琛都畀面出席，當然少不了中總大家族成員，好似副會長陳斌、袁武、莊學山，仲有榮譽會長霍震寰同余鵬春、劉鐵成等常董，總之多到數唔晒。