中環出更：陳幼堅潮着CDG老西晒型格
一套稱心西裝，係男士最佳代表。為唔少企業、品牌冠上新面貌嘅港產著名設計師陳幼堅(Alan)，就情迷日本殿堂級時裝設計師 COMME des GARCONS（CDG），每季出新裝，必定飛去日本掃貨。
日本「朝聖」買加細碼
由鬼才設計師川久保玲創立嘅hi-end品牌 CDG，深得名人歡心。Alan十幾年前已愛上日本風時裝，同期還喜歡日本國寶級時裝設計師山本耀司創立嘅Yohji Yamamoto，但最後還是覺得川久保玲嘅設計啱身啲。早前Alan出席「香港設計中心設計大獎2010」頒獎禮，就以一襲CDG西裝襯Prada黑西褲，盡顯個人風格。
Alan笑言自己一把年紀，揀西裝最忌古靈精怪，身上呢套大玩patchwork設計，classic得嚟唔會過火。但Alan買衫亦有難度，佢着加細碼，喺香港買西裝唔係咁易，惟有飛去日本「朝聖」嘞。
Alan仲有另一嗜好，就係自己設計西裝，再交由裁縫幫佢訂造，至今造咗十幾套。卓妮問佢點解唔索性打正旗號出品時裝，Alan笑言有諗過，如果有國際名牌搵佢crossover，佢都好樂意。