中環出更：九巴公主豪買頸巾撐社企
正在蜜運嘅「九巴金公主」伍穎梅（Winnie），喺愛情滋潤下着衫扮靚都寧舍唔同，時時刻刻都諗起個LOVE字。卓妮早前有日下晝行過中環士丹利街時，見到Winnie上咗十一號大廈十七樓嘅「The L plus H」，跟到上去才知道原來佢去幫襯呢間社企買愛心頸巾，品牌取名「Love+Hope」，意思係「愛與希望」。Winnie甜絲絲話，希望下次拖埋男友許晉平一齊去買衫。
「Love+Hope」品牌係一間社企生產嘅冷衫品牌，Winnie話最近從朋友口中得知呢個品牌，覺得好有意義，於是專程上去睇吓。推門入去，Winnie就被貨架上琳瑯滿目嘅冷衫吸引，睇完女裝再睇男裝，但揀來揀去還是鍾情一條紅色頸巾，披上頸後舒服到唔捨得除低，一於扑錘購買，盛惠一千六百元。呢個時候天氣開始凍，披上一條暖笠笠嘅頸巾真係啱晒。
買紅色新頸巾扮靚咁搶眼，唔通係佳人有約？Winnie唔肯正面回答，但一臉甜蜜話，下次會帶埋男友一齊上嚟揀衫，事關呢間社企聘請唔少中年失業人士，加上打正「Made in Hong Kong」旗號，好值得繼續支持！
聘中年失業婦展所長
卓妮八到，「Love+Hope」品牌背後嘅綿德社企有限公司，係由香港潮州商會永遠名譽會長莊學山及一群熱心企業家出錢出力創辦，公司由莊學山胞弟莊學熹做大股東。該公司喺屯門開設逾萬呎廠房，聘請近八十名員工，大部分都係來自新界天水圍、元朗及屯門嘅中年婦女，佢哋曾經見證香港製衣業最風光嘅大時代，可惜後來工廠北移，淪為失業大軍，如今終可盡展所長。
早前莊學山就安排香港潮州商會青年委員會幾十名成員參觀旗下社企廠房，大家眼見廠房各部門嘅現代化管理和科技配套，大開眼界。據聞綿德社企接到唔少歐美大品牌定單，非常好生意，所以話呢，「香港製造」四個字依然好值錢，只要有創意一定大有作為，所以莊學山做善事之餘，亦別具慧眼！
卓妮