政情：立會議員代晶晶出頭？
民建聯立法會黨團召集人葉國謙喺十一月廿四日嘅立法會大會上，將提出一個口頭質詢，內容係關於早排引起軒然大波嘅紅外線攝錄機。事關早前有人將跳水公主郭晶晶嘅疑似露點相放上網，呢啲相係用紅外線攝錄機拍攝，搞到着住泳衣嘅晶晶出現疑似露點。
葉國謙條質詢嘅內容主要係質疑政府對呢類紅外線攝錄產品冇監管，要求政府切實考慮立法打擊呢種行為，檢討現時監察互聯網上侵犯他人私隱嘅措施係咪足夠。大家都知道，郭晶晶同另一位立法會議員霍震霆（Timothy）大仔霍啟剛拍緊拖，而且仲一再傳出婚訊，莫非今次葉國謙想代Tim霍個未來新抱出頭？
葉國謙尋日就猛話唔關自己事，指提出呢條質詢係因為民記研究部覺得呢個問題好嚴重，加上佢又係黨內負責處理個人私隱問題嘅代表，所以先會提出呢條問題。佢仲話，自己提呢條質詢時冇同Tim霍傾過，所以談唔上係代Tim霍出頭喎。