政情：申亞解畫曾德成龜縮
特區政府為申辦二○二三年亞運會，一擲百幾億都在所不計，點知撞板撞到焦頭爛額，惟有死死地氣整個六十億縮水方案出嚟。尋日民政事務局上立法會解畫，但唔見局長曾德成身影，只有常秘楊立門出嚟畀議員圍插。其實曾德成唔係第一次匿埋唔見人，凡親有事佢就龜縮，搵同事幫佢頂，咁做真係有點兒那個囉！
尋日民政事務委員會上，大部分議員都鬧爆呢個縮水申亞方案，眼利嘅民主黨立法會議員張文光質問點解曾德成唔蒲頭，係咪代表政府打定輸數？楊立門苦笑話，尋日係廣州亞運開幕，曾德成要去廣州，仲話佢開完會都要北上㗎。張文光一針見血，追問點解曾德成又唔開埋會先上去呢？去到呢個地步，楊立門都只能以有啲工作要曾德成先做到幫德成局長解圍，張文光亦無作追問，可能唔想楊立門為難啩。
遠嘅唔講，就講今個星期二政府宣布呢個縮水方案。德成局長都只係出新聞稿了事，其實當日佢去咗香港體育學院參觀，參觀完仲就體育發展同記者侃侃而談，偏偏有必要要佢講嘅又唔現身，平時就成日去埋啲開幕禮、嘉許儀式等，今時今日咁嘅服務態度又點夠呢？