政情：袁國強深明紅隧「困」苦
紅隧由朝塞到晚，政府搵顧問整咗份報告，建議「紅加東減」，尋日畀咗交諮會討論。新任交諮會主席袁國強尋日首次見傳媒，雖然佢無表態支持紅隧加價，但就話自己返工放工成日都要過海，好清楚紅隧嘅塞車情況，自己都好希望搵辦法解決。
袁國強話，份顧問報告內容好長，需要花啲時間研究，而且呢件事嚴重影響民生，遲啲要再同班委員開會討論。佢仲加多句，話單睇份報告，好難即時畀意見，好似有人建議最好三條隧道劃一收費，表面睇好吸引，但係咪可行無人知，所以暫時佢都唔會表態。
不過，佢話自己辦公室鄰近中環，三條隧道都有用，亦好明白紅隧嘅塞車情況，佢自己無論作為市民或者交諮會主席，都好想搞掂呢個問題，遲啲會收集埋市民意見，再寫份建議書畀政府。其實袁主席係資深大律師，睇文件、寫報告易如反掌，希望佢急市民所急，快啲寫好份報告交畀政府。