政情：夏佳理喜獲大Sir扑頭
行政會議成員夏佳理（Ron）尋日獲科技大學頒授法學榮譽博士學位，咁啱佢下周六（二十日）將獲頒大紫荊勳章，阿Ron可以話係雙喜臨門。阿Ron獲頒大紫荊嘅消息今年七月一日已經公布咗，只係因打風關係，授勳典禮要押後，搞到阿Ron個勳章遲遲未到手。尋日向阿Ron頒授榮譽博士學位嘅科大副監督大Sir鍾士元，本身亦係大紫荊勳賢，佢幫阿Ron「扑頭」時笑得相當燦爛。
阿Ron話，今次係自己第二次獲頒榮譽博士學位，上一次係城大，今次輪到科大，佢覺得好開心同榮幸，但暫時唔會慶祝住，會等埋正式拎到大紫荊勳章再同家人慶祝。阿Ron仔仔一直住喺菲律賓，不過因為工作繁忙，今次應該抽唔到身返香港出席授勳典禮，同佢分享喜悅，不過阿Ron已經約好幾個喺香港嘅親人，溫溫馨馨咁食番餐慶祝。
