政情：林健鋒踢爆唐唐亂噏

港府前日公布關愛基金督導委員會名單，二十名非官方成員當中，只得三名商界代表，畀人批評有違政府商界合作齊齊關愛社會嘅原意。面對有關質疑，擔任委員會主席嘅唐唐前日喺記者會上，搵肥胡做擋箭牌，話肥胡以總商會身份入委員會，已經代表好多商界。事後隨即有人爆料，話總商會理事會對關愛基金有唔同意見，肥胡無可能代表總商會入委員會，暗批肥胡亂用總商會招牌、甚至有違理事會決定。

非代表總商會

我哋尋日同Jeffrey傾開呢件事，佢就反轟爆料者亂噏，指督導委員會內二十名非官方成員，雖然好多來自不同團體或政黨嘅成員以至領導，但全部以個人身份接受任命。佢又話，如果肥胡代表總商會入去，連埋佢在內豈不是同時有兩個總商會代表？做過工總主席嘅唐唐，點會唔識避免得失本港其他幾個主要商會呢？Jeffrey估計政府揀中肥胡，係佢身兼醫管局主席又係資深會計師，將來審批一啲同醫療有關嘅資助項目以及制訂基金投資策略，都可以畀到意見。

對於有人質疑關愛基金概念係向自由黨前主席田北俊「抄橋」，但自由黨卻無人獲委任，反而其死對頭經濟動力召集人Jeffrey就有份。Jeffrey就反駁，香港有咁多商界人士，政府委任邊個唔委任邊個，有心欲文章嘅一定可以搵到材料，希望大家「用個心去做事，唔好淨係用把口」喎。

至於話總商會理事會唔撐關愛基金一說，據悉理事會只係對應否以商會名義，呼籲旗下會員向基金捐款有不同意見，唔係否定整個基金嘅成立同概念。

此外，另一督導委員會成員、港大社會工作及社會行政學系講座教授周永新尋日喺電台提議，由關愛基金向所有冇攞綜援、而資產少於三十萬元嘅長者及少於五十萬嘅長者夫婦，每月無條件發放一千五百蚊資助。委員會連第一次會都未開，成員已公開提出要求，將來肯定有排拗！