中環出更：黃志祥夫婦三千元掃靚生果

最愛頂級榴槤大杧果

卓妮行過去生果舖睇吓，原來黃太喺舖頭內揀緊生果；雖然有司機喺度等佢哋，但卓妮見到黃志祥都企咗喺生果舖門外等候，睇吓老婆大人有咩要幫手。當時黃太已買到尾聲，正從手袋銀包中攞出一疊銀紙找數，黃太數錢期間，生果舖負責人就幫手搬咗幾箱生果出去車尾箱，其中兩箱係澳洲及泰國大杧果，另外仲有多款靚生果。據聞黃太今次好豪，一共買咗三千幾蚊。

卓妮上前同黃志祥打招呼，問佢係咪等太太買生果，佢就好有禮貌點頭，黃太亦報以微笑，然後一齊登上座駕離開。據聞黃志祥夫婦係呢間生果舖嘅熟客，每次入貨都指明要買最靚嘅生果，最鍾意食頂級嘅榴槤及泰國大杧果，買親都幾千元。黃志祥喺新加坡出生，父親為已故新加坡地產大亨黃廷方，所以黃志祥鍾意食榴槤同杧果呢啲東南亞生果，一啲都唔出奇。

不過，卓妮就打聽到黃志祥夫婦前日買咗雙份生果，據聞係準備攞去探望兒子黃永光夫婦及孫仔黃家寶。家寶本月底就一歲生日，莫非做爺爺嘅黃志祥，打算去同乖孫慶祝生日？不過，杧果食得多會濕熱，小朋友都係唔適宜食咁多，榴槤就更加唔好食嘞！

卓妮目送黃志祥夫婦座駕離去後，生果舖隔籬間「合隆麵家」負責人就行出嚟打牙骹，透露黃志祥夫婦好鍾意食佢哋啲魚蛋，仲話買生果前幫襯佢哋買咗兩斤魚蛋同魚片，盛惠百多元。咁識幫自己省招牌，真係識做生意。

生果店負責人幫黃太搬咗兩盒大杧果到門外座駕車尾箱。	黃太等店員找完錢，步離生果舖。 （陳嘉順攝）	黃志祥同太太乘座駕離開。
放大圖片	泰國大杧果	頂級榴槤

卓妮