政情：田北辰恨抱孫出晒面
自由黨前主席田北俊嘅新抱第二次懷孕，呢個已經係田少第四個孫，搞到田少細佬田北辰恨到流晒口水，事關田二少恨抱孫，自由黨高層人人都知，佢雖有一子三女，但全未成婚，抱孫夢遙遙無期。
田二少未有機會享受湊孫樂，可能愈缺乏，心靈愈渴求，平日一見到幾歲大嘅細路仔，就好似螞蟻「嬲」蜜糖。好似前晚「萬聖節」咁，自由黨喺新界西搞居民慶祝活動，身為中常委嘅田北辰特別現身撐場，知道有大班小朋友在場「扮鬼」，機不可失，六十歲嘅佢帶住個老虎頭套扮野獸，成晚黐住班細路，攬頭攬髻，雖然係人哋個孫，一樣玩到忘晒形，唔記得班細路家長先至係有資格投票嘅選民。田二少有幾恨抱孫可想而知。
田二少曾經講過，一生好少求人。不過，睇嚟佢真係要肉緊啲拜託班仔女快啲拉埋天窗，開枝散葉，咁就可以弄孫為樂，唔使成日玩人哋個孫啦！