中環出更：賭王合家歡 三房人陪受勳
超強颱風鮎魚打亂咗今次特區政府嘅授勳典禮，卓妮收到風，典禮已鐵定喺十一月二十日（周六）舉行。有份獲頒大紫荊勳章嘅賭王何鴻燊唔單止無唔開心，近日仲在家密密練習喺授勳典禮上嘅講辭，仲諗好晒安排三房人陪佢授勳。二房千金超鳳等三姐弟都喺名單上，三太陳婉珍及四太梁安琪都有份。呢個安排，照顧晒三房人，可謂皆大歡喜！睇嚟做過大手術嘅賭王，心思仍然好縝密。
東華三院尋日中午舉行一年一度嘅秋祭典禮，久未露面嘅三太以副主席身份出席，賭王千金何超蕸亦以總理身份嚟撐場。祭祀儀式喺上環文武廟舉行，東華主席梁定宇與一眾董事局成員着晒中式唐裝，喺祭壇前誠心祈福。
超蕸好孝順，趁機為爸爸祈福。佢話東華每年均舉行奉祀文武二帝嘅秋祭典禮，除咗為香港市民祈福之餘，今年仲會向上天祈求爸爸身體健康。
胃口好 起身行路
講起賭王近況，三太更滔滔不絕，話賭王唔單止胃口好，仲慢慢起身行路，但暫時未可以四圍逛街。三太知賭王怕悶，有時會以氹小朋友嘅口脗話：「嗱，嚟我屋企食飯就當係去咗街喇。」賭王欣然接受，每星期有一至兩天造訪三太家，餘下時間就去其他家人屋企，享受天倫之樂。
授勳典禮擇日再舉行，賭王都話好期待。外界一直揣測，佢會「欽點」邊位太太或子女陪伴受勳，事關禮賓府地方淺窄，陪伴受勳者入場嘅人數有限制。到底賭王安排邊個陪佢去？三太甜絲絲話，佢會去，四太梁安琪都會去，至於二房就有三位代表，仔女都有份，擺明唔偏心。賭王呢招無分彼此，令三房人心服口服。
同場仲有東華副主席施榮恆（Ivan），呢排大閘蟹正合時，Ivan率先大飽口福，上星期從上海訂咗二百隻陽澄湖大閘蟹抵港，同兄弟們分甘同味。
卓妮