新一份施政報告致謝動議又遭否決，這是煲呔曾六份施政報告第四次不獲立法會通過。鬼咩！整份施政報告無論在房屋、扶貧及安老上，一味有姿勢冇實際，真係幫唔到市民。
施政報告吹到好似佛偈咁，一切希望在明天，要言之：「平常心是道，到老無煩惱；夏熱便乘涼，冬寒便着襖。」而施政報告經不起稍為推敲，睇真啲，原來空洞無一物，叻過趙州禪師多多聲矣！有一則佛家講何為珍貴的問題——佛問：世間何為最珍貴？弟子答：已失去和未得到的。佛不語。經數載，滄桑巨變。佛再問之，答曰：最珍貴的莫過於正擁有。
大家應知致謝動議被否決嘅主因喇！政府一次又一次叫市民大眾失望，「置安心」吹到天花亂墜，「先租後買」，成條彩虹通向羅馬，之不過，政府又無良策良方穩定樓價。嗱，德國住房就唔同嘞，德國房價十多年保持不變，擁有自己房子的比率為百分之四十二，租屋的比率則達百分之五十八，年輕人中百分之七十七都是「租客」。此外，政府還鼓勵自建房、合作建房、打破地產開發商對房屋的壟斷。
香港啲高官卻連「漢堡人才」也談不上。乜叫做「漢堡人才」呀？即其人猶如巨大的漢堡，外表光鮮，實際卻沒有多少「營養價值」。多數搵工跳槽失敗嘅就係呢種人，而香港啲高官，有「漢堡人才」的級數已撈得掂，攆都唔走，更多的不但腦退化，甚至腦殘，一樣「好官我自為之」，好似批三蚊資助幼稚園學生，而行政費卻要三百多元。
老朽此生，睇怕無緣睇到份實而不華可致謝的報告矣！