政情：鬍鬚曾曲線抬舉自己

網誌憶舊同窗霍爾德

美國司法部長霍爾德早前嚟香港出席國際知識產權執法會議，鬍鬚曾喺網誌寫到與呢位美國史岱文森高中舊同窗重聚，憶述霍爾德當年成績喺同級中屬中游，但平均分已經攞接近滿分嘅九十分，反映校風好學，競爭激烈，收生亦好嚴謹。

講到呢度，鬍鬚曾原來想借霍爾德嚟兜個圈抬舉自己，話自己嘅成績比起霍「好不了多少」，即係成績好過人喇，又話自己當年來到紐約一年，就考到入史岱文森，唔單止父母感到喜出望外，連佢自己都「感到驚奇」，講到自己成個神童一樣。

鬍鬚曾呢篇網誌，無非想話畀人知自己讀書有幾叻，唉，如果佢真係覺得自己咁叻，就不如索性去美國政府做財政部長嘞，相信好多香港人會喺赤鱲角機場外夾道拍手歡送佢。