政情：李家祥搞慈善變生手
全國政協李家祥（Eric）今年做咗馬會董事，填補陳祖澤退任而騰出嘅空缺。接手咗兩個月，Eric謙稱都仲係學緊師，仲有大把嘢要學。照計Eric以前都有做開慈善工作，又係馬主，對馬會感情咁深，而家做埋大董，幫手搞慈善應該一啲都唔生疏，Eric就話，做善事原來同佢職責有關。
負責放水派錢
Eric咁多年來擔任過唔少公職，不過佢話以前佢做慈善，主要係負責吸水攞錢，但係依家就剛剛相反，要負責放水派錢，職責啱啱相反，所以都真係要重新適應。
之不過咁，有一樣嘢係呢兩個月無變過嘅，就係佢嘅馬主身份，Eric搞笑話無論係以前同依家，佢都一樣會刨馬仔，亦一樣會問人攞貼士，除非撞正嗰個賽馬日要當值，咁就無得畀佢發揮，否則其他日子佢都一樣可以繼續以佢馬主嘅身份入場考眼光，所以對佢影響都唔大，不過依家話晒多咗一重身份，所以同馬會嘅關係比以前更加密切啦。