政情：何栢良蔡堅爭連任兩種心情
專責監管註冊醫生嘅香港醫務委員會最近爆發咗一場好激烈嘅選戰，話說喺醫委會做咗九年委員嘅蔡堅同另一委員陳以誠嘅三年任期，將於明年一月中屆滿，兩人決定角逐連任，但另外有三名猛人參選，包括何栢良及蘇潔瑩，前兩位分別係前任及現任公共醫療醫生協會會長，另一人則係港大教授。
喺公立醫院做咗逾廿年嘅何栢良雖然喺立法會醫學界選舉輸咗畀怪醫梁家騮，但佢決定屢敗屢戰，仲喺政綱透露，本港有一半註冊醫生喺政府工作，但醫委會竟然無公院醫生代表，佢希望藉今次參選，可以將五千名公院醫生嘅聲音帶入醫委會。
醫會僅七席由業界選出
角逐連任嘅蔡堅就話，擔任醫委會委員可以為業界主持正義，被問到有無信心，佢就好豁達，形容依家忙到去廁所都唔得閒，一旦落選，仲海闊天空，可以做少好多喎。醫委會得七席係由醫生業界選出，其餘廿一席係政府委任同醫學會代表，呢場鬥到難分難解嘅競選，一個月內就有選舉結果嘞。