政情：五散人真的散咗？

五散人合作兩年，關係唔止無拉近，反而仲愈嚟愈散，呢個趨勢喺陳健波最新一期嘅議會工作報告中露出端倪。報告第一頁登咗五散人月前立法會組團考察上海世博時嘅留影，五人分開站立，喺最後一頁，登番同一背景嘅「全家福」合照，但五人嘅「甫士」則變成搭晒膊頭，溫馨感人。

陳健波工作報告露端倪

陳健波講起張相，初時欲言又止，指相片寓意五散人開始時散修修，希望最後可以好似卷尾張相咁愈走愈埋，團結一致。追問之下，陳健波先至吐出一句，指現時五散人中嘅陳茂波同林大輝似已歸邊，分別各與兩位疑似特首候選人「CY」梁振英同政務司司長唐英年「友好」，佢的確擔心隨着特首選舉逼近，五散人會愈嚟愈散，屆時真係好令人惋惜咁話。

陳健波並非杞人憂天，有「散人」透露，從最近一件事，可見「五散人」合作已現危機。民主派對施政報告致謝議案提出強烈譴責港府不復建居屋嘅修訂案，從五散人嘅投票取向，就知五人內部已呈不同陣營，陳茂波與譚偉豪站在同一陣線，支持修訂案，即係批評政府不遺餘力，陳健波投棄權票，實則係消極式反對，同林大輝聯手否定修訂案，即係企喺政府嗰邊，兩邊陣營勢態已成，一直喺五散人角色最疏離嘅怪醫，選擇避席投票，相信就係向四人清楚表態，保持中立。一個議案，五個人出現支持、反對、棄權同唔投票四種取態，五散人依家有幾散可想而知，情況令人憂慮。

隨着二○一二嘅選舉日近，政治形勢不能因為個人嘅主觀意願而轉移，預料五散人唔單止係五名立法會議員一個瀟灑嘅外號，而確係佢哋嘅實際情況，就係——散晒。