中環出更：譚天放話中國人唔識寶
竹除咗用來點綴家居，仲可以製成乜？答案係杯同地板。竹之妙用多籮籮，工業總會近年大力推廣竹業生意，仲將竹杯包裝成小禮品，送畀尋日出席跑馬地馬場工總五十周年盃賽嘅貴賓。
竹杯送貴賓
呢個杯睇落係由竹樹嘅其中一節製成，滑不留手，絕對唔怕拮親手，杯身設計古色古香，好有書卷氣。工總竹業委員會主席譚天放教大家尋寶，佢話，大家對竹樹認知唔多，查實佢係寶藏，皆因竹嘅生長期只需五年，比木材快得多，竹吸收二氧化碳量又比樹林多三倍，你話發展竹業生意係咪環保得多呢？佢仲話中國人唔識寶。
工總善用竹呢種材料，除咗做杯，仲做埋建材，諗住將位於長沙灣新寫字樓用竹嚟裝修，將竹鋪喺接待處地板同牆壁，令人耳目一新。無竹令人俗，咁嘅寫字樓，一定令人耳目一新。
卓妮