中環出更：邱達宏林健鋒「勾結」得米
「官商勾結」四個字唔講得笑，不過香港工業總會尋日喺跑馬地馬場慶祝成立五十周年盃賽，大家就專登攞嚟搞gag。話說工總ＣＥＯ邱達宏提議主家席上十五位賓客夾份落注考眼光，廠商第一副會長羅富昌、立法會議員林健鋒（Jeffrey）都夾埋一份，集資千五元想話刀仔鋸大樹。羅富昌就笑言「呢度有官商勾結」，叫卓妮嚟踢爆，真搞鬼。
身為主人家，邱達宏帶頭搞氣氛，提議一眾V.I.P賓客夾份買馬，將千五元賭本押注喺工總副主席劉展灝隻愛駒「彪形好漢」身上，可惜馬仔最後跑梗頸四，千五元賭注泡湯。
不過，正所謂有賭未為輸，邱達宏同Jeffrey雙雙喺第三場大發神威，中咗三重彩，每十元注派彩近三百九十元。落注十元嘅邱達宏賽後呻笨話買得少。Jeffrey牙擦擦話：「係人贏馬都話買得少！」
梁高美懿老公拉頭馬
報捷嘅仲有恒生銀行副董事長兼行政總裁梁高美懿，佢先生隻團體馬「皇仁神駒」奪冠，獎金高達三十六萬四千多元，梁生以皇仁舊生身份拉頭馬，雀躍非常，太太都戥佢興奮。
卓妮