中環出更：田少捐靚酒與150巿民同享

旅發局主席田北俊係美酒專家，飲得，更捨得。尋日一於做孟嘗君，捐出一支約值八萬元九五年Mouton-Rothschild Imperial紅酒，與一百五十名愛酒嘅市民齊乾杯，酒香飄千里，田少新抱Cherye大住肚都嚟支持。
田北俊（左三）捐靚酒，與旅發局總幹事劉鎮漢（左一）、貿發局副總裁方舜文（左二）、品酒師協會會長周國明（左四）及王英偉夫婦（右二及三）舉杯。
田北俊（左三）捐靚酒，與旅發局總幹事劉鎮漢（左一）、貿發局副總裁方舜文（左二）、品酒師協會會長周國明（左四）及王英偉夫婦（右二及三）舉杯。

新抱大肚撐場

西九海濱長廊尋日擠得水洩不通，唔少市民遠道而來參加由旅發局主辦嘅美酒佳餚巡禮，尋日係最後一日，田少除上台主持最後一場「名人名酒薈」，仲開酒與眾同樂，將六公升嘅Mouton-Rothschild Imperial紅酒分成一百五十杯，同搶先買得「尊尚品酒證」嘅市民分享名釀，每杯約四十毫升，屈指一算，飲一杯等如飲咗五百三十幾元落肚，抵到爛。

田少捐出呢支Mouton-Rothschild Imperial，二○○○年買入，現時已升值十倍。 （何偉鴻攝）
  • 田少捐出呢支Mouton-Rothschild Imperial，二○○○年買入，現時已升值十倍。 （何偉鴻攝）

賓客盡興，田少happy到極，不過啲酒再甜，都唔及新抱嚟撐場咁心甜。卓妮見「細田太」腹部微隆，睇嚟有四、五個月身孕，田少報喜話，快將抱第四個孫，今次係新抱嘅第二胎，恭喜，恭喜。美酒當前，「細田太」為BB着想，唔敢飲酒，全程喺台下為老爺打氣。

對於愛嘗杯中物嘅名人，尋日係難得機會。嗒咗兩啖Mouton-Rothschild Imperial嘅駿豪集團副主席王英偉（Wilfred）對支酒讚不絕口：「極品！好正！入口好滑。」Wilfred都珍藏咗一支八二年「瑪高」，一直唔捨得飲喎。囝囝王梓軒都唔輸蝕，喺外國讀書時曾修讀品酒課程，練得一身好武功，用個鼻嗅吓就知支酒是龍是鳳。

梓軒鍾情飲紅酒，自從做咗歌星後就戒飲，皆因擔心紅酒會令雪白牙齒變色，唔多靚，近年已轉飲白酒。

田少新抱（左）佗住BB唔敢飲酒，方舜文（右）就杯不離手。
  • 田少新抱（左）佗住BB唔敢飲酒，方舜文（右）就杯不離手。
美酒當前，王英偉（左一）與囝囝梓軒（中）及太太盡情飲多杯。
  • 美酒當前，王英偉（左一）與囝囝梓軒（中）及太太盡情飲多杯。

卓妮

Money18新功能「18好路數」為你預測心水股票升跌機會率