政情：Tim霍飛髮不忘Sell申亞
一聽見要用四百億元搞亞運會，港人即時噓聲四起，一向支持申亞嘅港協暨奧委會會長霍震霆（Tim），明白個報價單嚇親人，最近四出做說客，希望喺諮詢期截止前，可以爭取到市民支持。
Tim霍尋日出席活動，支持做志願者團長嘅大仔霍啟剛同總領隊葉振都，帶隊北上為廣州亞運會做義工。見佢左邊頭髮飛起一執，原來佢前日先理完髮，仲話髮型師邊剪邊同佢呻喺香港好難搵到平靚正波地踢波，Tim霍即時順水推舟同髮型師sell埋申亞。
佢話申亞係從市民健康出發，事關場館會留畀市民用，而且仲可以幫手解決社會問題，好似選手村可以留番嚟畀市民住，價錢又唔貴，住屋需求可以紓緩吓，加上運動會嘅軟硬件有利帶動經濟，最終都係市民得益，總之理由一大堆，但要問過市民至知受唔受。
啟剛同啟山都力撐父親，贊成申亞。啟剛話佢依家都做緊說客，呼籲體育界以個人名義發聲，大家團結發表意見，等大眾同政府聽到業界聲音，加上弟弟啟山有份幫手嘅廣州亞運喺諮詢期之前舉行，到時可以曲線宣傳亞運嘅好處。