有「新金王」稱號嘅全國政協委員黃英豪係上市公司金至尊主席，坐擁可觀嘅黃金，一定係特別留意金價走勢。近排金價狂升之後回軟，新金王就大派定心丸，佢睇好金價會喺一千三百蚊美金一安士企得好硬淨。
近排樓股兩市都慶合合，市場開始憂慮有泡沫，黃英豪日前出席母校英國肯特（Kent）大學喺香港嘅活動時，我哋問佢點同樓股兩市把脈。佢話睇唔到股市有大泡沫，事關股市資金主要以歐美為主，內地資金比重偏低，故此唔使太擔心。
但佢擔心樓市有泡沫，仲話喺部分地區已出現咗過度投機嘅情況。佢認為政府治本之道係推出多啲土地，市場供應多咗，炒家自然好難炒賣。佢又話，香港仲有好多土地，好似長沙灣屠房都丟空咗廿年啦！對於施政報告提出嘅「置安心」計劃，備受各界詬病，黃英豪都冇面畀，批評遲至二○一四年至有一千個單位推出，遠水都救唔到近火啦！
