堆填區撞大板 焚化爐又走寶

近排官場最黑仔嗰個,環境局局長邱騰華認第二,冇人敢認第一。環保政策鑊鑊衰,呢次諗住夾硬徵用郊野公園用地擴建堆填區,畀立法會一招廢法偷襲成功,直頭瘀到痹。

有關注團體尋日為邱騰華送上特別「大禮」,唔係抗議信,而係「偉哥」藥丸,諷刺佢環保一事無成冇瓣掂。其實淨係「偉哥」都未夠,最緊要補埋上面。問題出喺個腦,諗埋一邊,應做唔做亂嚟,梗係撞板啦。

講番垃圾處理呢筆,過去十年本港固體廢物增加咗三成四,現有堆填區過幾年就會飽和。當局對廢物處理無所作為,既唔想辦法喺源頭減少垃圾,又唔肯盡快建焚化爐,獨沽一味垃圾堆填區,滿瀉就擴建,呢次卒之搞出個大頭佛。

查實焚化爐唔係洪水猛獸。浸會大學一項研究顯示,以焚化方式處理垃圾喺海外相當普遍,其中德國、荷蘭、台灣、新加坡同日本,焚化爐燒垃圾比例由最少約三成到最高嘅八成。雖然香港起步遲,仍然有條件利用垃圾焚化發電。

垃圾焚化可以化腐朽為神奇,既能夠紓緩堆填區壓力,又能夠發電,仲可以創造就業添,一舉三得。咁着數嘅方法,當局居然一拖再拖唔實施,你話係咪個腦有問題吖?

唉,環境局官員眼矇、耳聾兼壞腦,良莠不分,珠寶當係草早有前科啦。呢,青洲英坭四年前已經向環保署提交咗一個處理垃圾方案,叫「環保廢物熔化系統」。簡單嚟講,就係將水泥生產過程同燒垃圾結合,用都市固體廢物代替燃料煤生產水泥,過程中產生嘅剩餘灰燼又可以循環再用,做水泥生產原料,既環保又有經濟效益,垃圾處理量高過傳統焚化爐,而且成本更低,啱晒香港。

開講有話,禮失求諸野,港府高官明知自己冇腦,照計應該多聽專家意見,集思廣益至係正路㗎。吓,估唔到呢班官老爺有眼無珠,擇惡固執,以選址同當局計劃中選擇嘅地方唔同為理由,拒絕考慮方案。

話時話吖,抽膠袋稅畀人狂炳,港府照樣掠水;派慳電膽券唔驚畀人鬧利益輸送;硬銷停車熄匙劣政亦唔驚擾民,「環保廢物熔化系統」既有利減排又惠及市民,當局居然前怕狼後怕虎,一直唔接納。係咪真心支持環保,畫公仔唔使畫出腸嘞啩。

話到尾,香港環保搞到一鑊泡,處理廢物嘅好橋胎死腹中,好大喜功、冥頑不靈嘅環境局高官難辭其咎。

前兩日有環保團體上街抗議港府喺環保方面無所作為,誓要「休騰華」,表達咗市民嘅心聲。計功夫茶話齋,如果班庸官仲知廉恥,快啲主動讓賢罷啦!