中環出更：張永珍囝囝鍾情靚車名錶
政壇富婆張永珍早前以兩億五千萬元成功競投乾隆古董葫蘆花瓶，出手闊綽令全城嘩然。早前卓妮見到張永珍兒子、大慶石油公司總經理馬忠禮，原來佢情迷靚車同名錶，癡迷程度同媽媽對古董嘅熱情不相上下。
戴二百萬卡地亞
對上一個周日沙田馬場舉行中總盃賽，作為中總會董嘅佢都有去撐場，而且幾乎由頭坐到尾。佢話佢名下靚車有十二架，包括林寶堅尼、瑪莎拉蒂等。至於名錶佢最鍾意卡地亞，大大話話有十二隻，最貴嗰隻要成二百幾萬。當日佢以一千五百幾蚊嘅賭注，贏咗十五萬，眼光同埋手氣都唔錯。
講番媽媽價值連城嘅古董收藏，佢話啲古董擺喺香港嘅銀行保管箱，方便媽咪得閒去睇吓。上次張永珍送咗個用四千幾萬投番嚟嘅古董花瓶畀上海博物館，馬忠禮爆料話，其實嗰次都係博物館館長自己一個人落嚟香港攞上去，只不過買多一張飛機票咁啫。佢買埋隔籬個位，睇怕係留番畀個古董坐，諗落都幾牙煙，不過又邊有人知佢帶啲嘢咁貴呀！