中環出更：港元大縮水富商保值有法
受美元貶值影響，港元大縮水，港紙對多國貨幣愈來愈唔見使。為保身家，名人諗計生財。太子珠寶主席鄧鉅明（Jimmy）覺得買黃金、買樓最保值；玩具大王蔡志明都認同買樓係唔錯選擇，但提醒小市民提防息口波動，置業還需量力而為。
買「磚頭」黃金
Jimmy鄧同太子珠寶執董朱繼陶（Joseph）尋日入馬場為愛駒打氣，講起呢排美金偏軟，投資邊樣最划算？Jimmy話，買「磚頭」同黃金，唔差得去邊，總知少揸美金為妙，但投資切忌瞓身，要保留一定「茄薯」，等機會來臨時有彈藥執平貨。Joseph朱就三句不離老本行，話名錶價值與日俱增，尤其係買世界十大名錶，更具升值潛力。
蔡志明擅長投資商廈及豪宅物業，眼光獨到。呢排樓市咁高，買唔買得過呢？蔡生就不便評論嘞。佢話優質物業保值能力高，但買樓前要衡量個人能力及風險，千祈咪過度借貸喎。