港人閒時愛旅遊，北上「平玩平買」更是一樂也。但人民幣升值後，皇朝旅遊負責人布漢銘直言「上面優勢少咗！」布指內地物價其實並無大改變，但不少旅遊熱點，例如廣東省或東北地區的酒店及商店都要求消費者以人民幣付帳，「指數變咗（人民幣升值），咁香港人咪要畀多啲錢囉！」另一方面，旅行團亦要增加團費應付成本上升，布坦言公司過去半年團費已因此增加一成，而近月參加內地旅行團的港人亦下跌百分之五至十，改為以個人遊到內地。
「繼續咁升落去，不如去澳門玩！」布對升值帶來的影響感到無奈，「冇以前咁抵，但係都冇辦法啦。」他希望旅遊業議會能主動與內地酒店及商店討論設立匯率定值的可行性，避免因匯率浮動而不斷打擊香港往內地的旅行團，亦可「睇吓可唔可以用港幣找數囉！」