政情：王桂壎怕肥唔選立會
香港政制踏入另一個新階段，唔少人都磨拳擦掌準備嚟緊兩年爭入熱廚房，不過就有一個人例外，邊個？咪就係律師會會長王桂壎囉！王桂壎早排先連任會長，參加嘅社會事務仲愈嚟愈多，仲幫埋廠商會手，落區為街坊做法律諮詢，大有晒冷之勢。點解忽然話唔選呢？
以前做過政府律師同前行政立法兩局議員辦事處法律顧問嘅王會長直言，對做議員興趣不大，仲話雖然享受立法過程嘅工作，但喺兩局時都睇夠做夠，加上自己對權力戀棧唔深，所以有時間都希望做多啲實事，直接幫到市民就最高興。王會長仲自爆，唔選立法會之餘，可能亦唔會再增加公職事務。原來王會長慣咗一多嘢做、壓力一大，就會忍唔住口係咁食嘢，所以要兼顧律師樓同各項公務，已經令佢發福唔少；若再做「兼職」，佢擔心自己體重超標喎！其實入熱廚房焗四年桑拿，分分鐘減到肥仲通埋血氣，王會長可以再諗諗喎。