政情：陳振彬搞論壇 同80後交流
青年事務委員會主席陳振彬（Bunny）尋日搞咗個名為「我們都是八十後」嘅論壇，請嚟多位八十後青年作圓桌交流。現場並冇吸引青年嚟掟鞋或示威，反而請嚟一個不速之客，搶咗主人家風頭。
青委會被寸係「老人院」
Bunny尋日請嚟幾位唔同背景嘅八十後，包括社運人士林輝、民主黨中常委莫兆麟同觀塘區議員鄧咏駿等聚埋一齊，講吓香港未來發展同青年嘅政治參與。不過在場唔少嘉賓都唔多認同Bunny嘅觀點，更有人質疑佢掌舵下嘅青委會成員可以拍得住安老事務委員會成員嘅年齡，又批評近年新開嘅青年廣場租金極貴，青年人根本負擔唔嚟。
Bunny反駁，青委會成員同安老委員會成員嘅年齡仲差一截，至少後生過婦女事務委員會嘅成員喎，又話青年廣場內嘅寫字樓好多都由年輕人租用，質疑係班八十後睇得太多報紙嘅炒作。
不速之客係行政會議召集人梁振英，佢不僅坐足全場，完場後仲捉實班八十後雞啄唔斷，主人家走咗佢都唔願走。