政情：楊受成贊助音樂劇關注乳癌
被視為世上最偉大音樂劇之一嘅《油脂》，本月喺灣仔演藝學院歌劇院演出。英皇珠寶贊助咗本周日上演嘅其中一場音樂劇，並將門票所得收入捐贈畀香港遺傳性乳癌家族資料庫。
與太太囡囡捧場睇《油脂》
《油脂》紅極一時，曾被譽為史上最偉大嘅音樂劇，咁多年來依然好受歡迎。十月十日嘅籌款演出，獲得城中名人捧場支持，英皇集團主席楊受成、太太陸小曼同囡囡英皇鐘錶珠寶董事總經理楊諾思都現身撐場，勞力士香港董事總經理Mr. Daniel Neidhart亦一同出席慈善活動，齊心推動市民對乳癌同健康嘅關注。
咁重要嘅時刻，又點少得香港遺傳性乳癌家族資料庫主席鄺靄慧。該資料庫成立於○七年，目標係收集遺傳性乳癌數據，以全力支持香港遺傳及高危乳癌普查計劃。佢哋經常舉辦各種公眾教育活動，增進年輕一族及高危人士對遺傳性乳癌嘅認識。