中環出更：呂志和陳聖澤同枱High Tea
嘉華國際主席呂志和上月先後增持股份後，尋日收市股價升到三元，更有分析指股價有機會倍升，和叔真係飲得杯落。卓妮早前就見和叔一支公悠然自得喺置地廣場間Landmark Cafe歎下午茶，期間竟然巧遇恒和珠寶主席陳聖澤夫婦去飲茶，陳聖澤一見和叔，即時上前握手打招呼，仲搭枱一齊傾吓偈敍舊，和叔見到老友當然笑逐顏開啦！
以「和哥」稱呼 關係友好
陳聖澤夫婦同和叔傾咗約二十分鐘後，和叔先行離開，佢兩公婆就繼續飲茶撐枱腳。原來當日陳聖澤夫婦約咗朋友食晚飯，赴會前趁有空檔，於是行去Landmark Cafe歎杯茶攝時間，點知咁啱遇到和叔，認真有緣。陳聖澤夫婦以「和哥」稱呼呂志和，相信大家都係好朋友，陳太對卓妮講，佢哋同和哥已經認識好耐，難怪見到面咁高興。
至於和叔會否係恒和珠寶嘅客人呢？作為老闆娘嘅陳太就話：「和哥唔係我嘅客，就算係，都係和哥嘅老婆啦！」意思係呂太先至會買珠寶首飾。咁陳聖澤夫婦又係咪和叔嘅客人呢？陳太就笑笑口話：「和哥旗下嘉華啲樓咁靚，邊度買得起呀！」恒和珠寶堂堂上市公司，澳洲礦石和河南金礦都買得起，和叔啲樓又點會買唔起呀，陳太真係識講笑。
記得去年八月底新世界地產旗下樓盤尖沙咀名鑄推出時，據聞陳聖澤都有派代表選購，一連購入四十幾樓兩個面積八百多呎嘅單位，涉資約三千五百幾萬元，出手闊綽；咁啱陳聖澤同年十二月娶新抱，係咪買畀囝囝新婚之用就唔知嘞。
卓妮