中環出更：女童軍爆醜聞孫太噩夢連連

孫太話，近期女童軍負面新聞不絕，仲搞到有人向廉政公署舉報，令佢好憂心，搞到晚晚發噩夢，夢見學生年代嘅自己，起床後趕住洗臉、着校服返學校考試，嗰種惶恐失措嘅夢境，已經幾十年無發過。孫太話，目前仍就事件諮詢法律意見，相信要等到呢個月十三日女童軍開完會後至有定案。其實孫太又使乜咁上心吖，當事人都笑容滿臉，佢無理由仲着緊過當事人㗎！

湯顯明陳詠梅孖住赴宴

「湯陳戀」主角廉政專員湯顯明（Timothy）及入境處助理處長陳詠梅（Helen）尋日都有現身酒會，兩人早前出席中策集團主席馬時亨慶祝「一桿入洞」餐飯時被卓妮踢爆，「地下情」迅即浮上水面，但估唔到浮力驚人，尋日大方到孖住去酒會，只係影相時仲好怕醜，特登企開啲，中間隔咗個人，仲要搵埋當日肥亨飯局後護送佢哋離開嘅新聞處處長黃偉綸戥腳一齊影相，相當有趣。

呢幾日忙於為漏報買樓解畫嘅行政會議成員劉皇發，尋日咁啱遇上喺最低工資問題上被人鬧爆嘅飲食界議員張宇人（Tommy），見Tommy「玄壇」咁嘅臉口，反而發叔就同身邊嘅「股壇教父」李業廣有講有笑，果然薑係老嘅辣。卓妮喺酒會上仲見到首次以署長身份出席酒會嘅懲教署署長單日堅，佢心情好輕鬆，仲話懲教署工作好有系統，只係更換領導啫！唔講唔知，原來單日堅同金城營造主席王國強係東莞同鄉，難怪兩人一見如故，非常好傾啦！

湯顯明（右二）與陳詠梅（左一）孖住出席酒會，「地下情」浮上水面。	湯顯明（中）同陳詠梅（右一）與賓客合照，中間隔咗個人，仲要搵埋黃偉綸（左二）戥腳。左一為百仁基金主席施榮忻。	財經事務及庫務局常秘區璟智（左）與久違了嘅前環境運輸及工務局局長廖秀冬，一齊行入酒會。
劉皇發（前中）與李業廣（前左）有講有笑，張宇人（前右）就木無表情；劉皇發身後為其女婿余漢坤。

卓妮