政情：聖若瑟誕首位女校長
百年男校聖若瑟書院今年出咗一位女校長陳美梅，下星期仲由多位名人校友以眾星拱月嘅姿態陪佢一齊會見傳媒添。陳校長原來係呢間傳統名校嘅首位女校長，喺呢個月接替首位華人校長梁長興出任校長，佢之前一直都係喺聖若瑟書院教書，一教就教咗廿七年，可以講得上係聖若瑟嘅老臣子。
陳校長之前做咗副校長三年，主力負責學生輔導工作，佢期間仲同時兼任學校會計科嘅科主任。加入聖若瑟之前，陳校長原來都喺考試局（現考評局）工作過。陳校長下個星期會同幾位傑出校友，好似立法會議員林健鋒、前立法會議員何承天以及行政會議成員梁智鴻一齊出嚟會見傳媒，到時陳校長仲會講吓聖若瑟喺新學制下嘅發展方向。
聖若瑟書院呢間傳統名校人才輩出，淨係講今年，佢哋已經出咗四位會考十優狀元以及三位大紫荊勳賢，諾貝爾物理學獎得獎者「光纖之父」高錕亦都係聖若瑟校友。