政情：搞18仝人葛珮帆孭鑊
民建聯早前為咗力捧五個地區新星，同商台合作炮製嘅節目《十八仝人愛落區》，最後畀廣播事務管理局裁定屬於政治廣告，要即時腰斬。民建聯對外一直都好強調話自己無辜，最後收咗商台賠償後，大家當冇事就算。十八仝人由開波已經是非多多，花咁多人力物力搞場大龍鳳最後得個吉，民建聯內部怨氣唔少，當中矛頭仲直指被力捧可能出選超級區會議席嘅沙田區議員葛珮帆（ＥＱ）。
ＥＱ係立法會議員劉江華愛將，原來成個十八仝人項目都係由ＥＱ牽線，當時佢同商台傾好晒，最後先返去搵中委支持。據講當時中委會上，已經有人質疑花六十萬買凌晨兩點到六點嘅電台時段，就算做行宣傳都冇乜成效，皆因正常人呢段時間都係瞓緊覺，收聽率咁低，又點會有人留意喎！
妨礙出選超級區會
之但係ＥＱ力說中委會，話商台會剪輯返啲精華片段喺朝早或者中午時段播，所以唔會完全冇人知，最終中委先至有保留地通過。要搞四個鐘嘅地區直播節目，區議員同地區助理都做到頭暈，心裏面冇怨言就奇嘞。
不過，多嘢做都唔係地區人士怨恨ＥＱ嘅主要原因，而係大家都睇唔過眼，佢將成個十八仝人搞到好似為自己度身訂造咁，鋪排機會畀自己曝光。通常每個活動嘅頭、尾場都比較吸引公眾注意，加上有「八十後」一早聲言會有狙擊行動，所以公眾一開始都特別留意。心水清嘅朋友都會發覺，ＥＱ第一個做十八仝人，一口氣做咗四集，攞盡頭彩，ＥＱ更安排自己做埋最後一集「守尾門」，有人就唔滿意佢賺晒所有知名度，所以喺黨內引起唔少不滿。
因為今次一手一腳搞十八仝人，又一手一腳孭鑊，ＥＱ除咗累咗個黨嘅名聲，仲得罪唔少地區樁腳，個底花晒，睇嚟將成為選超級區會議席嘅障礙。就算選立法會地區直選，都要因住班兄弟姊妹記仇懶懶閒拉票喎！不過ＥＱ就話，同電台合作係一個新嘗試，凡係試新嘢都會有風險，加上呢個係黨嘅集體決定，唔信班手足會怪晒佢，唔知事實有冇ＥＱ諗得咁美好呢？