中環出更：初見助養契爺 陳茂波激動
得人恩果千年記，四十八年前透過國際培幼會（契爺會）獲受助兩年嘅會計界立法會議員陳茂波（Paul），最近成功搵到當年助養佢嘅美軍中尉契爺Mr. Bruce，上月仲同家人遠道飛往美國華盛頓與契爺首次見面，大家見面一刻恍如隔世，如失散親人般激動相擁，場面感人。卓妮聽阿Paul描述當時情景已相當感動，如果身在現場肯定喊埋一份。
送仿清花樽表謝意
阿Paul同太太、囡囡去咗契爺屋企住咗三日，佢聽契媽講，契爺退役後一直擔任顧問工作，甚少放假，所以今次特登請三日假招呼佢哋，實在好難得。阿Paul話，契爺同契媽事前好緊張，一來擔心佢嘅英文程度低，礙於溝通，其次係唔清楚兩地文化差異，但當大家見面後，心中疑慮一一消除，事關佢一見面就行西禮，雙方擁抱一番。
四十多年來首次見面，阿Paul同契爺激動之餘，大家都暢談過去幾十年來嘅經歷。契爺同契媽又帶阿Paul一家到附近遊玩，大家都好享受三天嘅相處。為答謝契爺同契媽嘅恩德，阿Paul特別送咗兩份禮物畀佢哋，一份係頸巾，希望兩位七十九歲嘅老人家能夠用得着，另一份係中國仿清朝花樽，希望介紹中國手工藝之餘，樽面嘅蝴蝶圖案仲寓意自己由一條幼蟲慢慢變成蝴蝶。
阿Paul獲受助嗰年只得六歲，居於石硤尾木屋區，後來搬到廉租屋，生活改善後就停止受助。至於佢契爺點解會助養香港小朋友，原來係有次喺報紙睇到每月七元就可以助養一位小朋友，於是決定助養一位中國小朋友，但當時國際培幼會嘅助養計劃唔涵蓋中國，最後就選中咗居於香港嘅阿Paul。阿Paul話，契爺本身都已經有幾個仔女，但仍助養多位小朋友，好值得學習。
今次阿Paul過美國仲有一項重要任務，就係預早為女兒物色大學，佢話契爺好錫佢個女，借咗架房車畀佢哋四圍去，仲擔心佢哋唔識路跟埋去傍住，又話如果佢囡囡將來真係過去讀書，佢兩老可以照應吓喎！諗落阿Paul真係幸運，唔知呢啲係咪叫做「出路遇貴人」呢？
卓妮