政情：醫管局新CEO下月接棒
醫院管理局行政總裁蘇利民下月底正式離任，局方依家正密鑼緊鼓搵人選接棒，估計下月初可望正式公布繼任人。醫管局主席胡定旭尋日話，搵新ＣＥＯ好似揀老婆咁，要揀個最好嘅，仲講明話要好似現任ＣＥＯ蘇利民咁好。肥胡又自爆呢個星期二，遴選委員會已進行第一次面試，參與面試嘅四位候選人，佢話全部都係獵頭公司喺五百人中揀出嚟，當日首個回合已甄選出兩名本地薑。據悉，分別為醫管局質素及安全總監梁栢賢同聯網服務總監張偉麟，而梁栢賢正係肥胡嘅愛將。
不過，肥胡唔肯公開評論呢兩位候選人，只係話佢哋具有管理才能同經驗，好似喺少林寺訓練出身咁，工作能力非常強，預計下月初進行第二次面試，屆時並可分出勝負。
肥胡又趁尋日舉行醫管局大會，向做咗四年幾、最後一次出席大會嘅蘇利民致謝，讚揚佢為咗醫管局出心出力，立下唔少汗馬功勞。蘇利民亦禮尚往來，話會好掛住大家，顯得依依不捨。