政情：李家祥闖外蒙盡興而返
香港體育學院主席李家祥（Eric）夫婦同愛女暑假期間一家三口長途跋涉去外蒙古玩，全程有得食又有得玩，唯一唔慣係住蒙古包。佢哋三個香港人喺外蒙呢個少數民族地區，成為最受注目嘅「少數民族」，Eric笑言，佢仲被當地電視台訪問兩次添！喺香港都未有咁多訪問做！
臨時被邀上台主禮
早前Eric已經同我哋預告暑假會去外蒙闖蕩，結果返港後佢對外蒙之旅一直念念不忘。佢話此行遇上當地一個盛大節日，臨時被邀上台做主禮嘉賓，勁搞笑！呢個節目嘅內容好豐富，有點聖火、唱歌、跳舞同埋射箭等，大家玩得好盡興。
今次去外蒙係愛女嘅主意，事關囡囡好鍾意大自然，所以依家全家好少到大城市旅遊。個女又特別鍾意馬，當地有種著名馬匹，原本已經喺當地絕種，但後來有專家發現歐洲仲有呢種馬，於是帶返外蒙繁殖。
Eric嘅千金咁鍾意馬仔，以後可以成日出入馬場啦！事關Eric啱啱接替前馬會主席陳祖澤留低嘅空缺，躋身馬會大董。但佢叫我哋唔好叫佢「李大董」，因為仲未習慣喎！