中環出更:黃宗澤被中女粉絲死纏

無綫當紅小生黃宗澤(Bosco)一向異性緣佳,係咁意喺中環行個圈,就招來「粉絲兵團」。偶像近在眼前,女粉絲唔理咁多,飛身上前同Bosco傾餐飽,跟足幾條街,Bosco全程聽多過搭嘴,表現算有風度嘞。

早前一個星期六下午四時,卓妮見到Bosco喺中環置地出現,身邊有助手同保安傍住,睇嚟係啱啱出席完公開活動。Bosco星味濃,四個女粉絲到靚仔,好似螞蟻見到蜜糖咁high。粉絲咁熱情,Bosco亦顯得好受落,有問必答,其中一位蓄起髮髻、身形豐滿嘅中年女粉絲,顯得特別興奮,以傾慕眼神望住偶像,更不斷撩Bosco傾偈,講到眉飛色舞,其餘三個後生女粉絲想搵位插嘴都唔得。

Bosco惟有當乜事都無發生,繼續行去附近間酒店攞車,中年女粉絲照跟可也,搞到Bosco有啲避忌,快步跳上座駕甩身。臨閂車門前,中年女粉絲仲目送偶像上車,隔住車門玻璃同Bosco講聲bye bye。

Money18新功能「18好路數」為你預測心水股票升跌機會率