中環出更：黃百鳴嫁女 政商名人畀面
資深電影人黃百鳴愛女黃漪鈞（Alvina）尋晚出閣之喜，喺尖沙咀洲際酒店筵開五十席，舉行盛大婚宴。Alvina嘅夫婿大有來頭，正是恒生銀行創辦人林炳炎後人林秀棠嘅兒子林詩澔（Owen），所以除咗娛樂界中人出席外，政商界名人亦畀面參加婚宴，一對新人喺大批親友見證下完成結婚人生大事！
卓妮分別見到中聯辦副主任李剛、教育局局長孫明揚伉儷、英皇集團主席楊受成、利豐集團主席馮國經、玩具大王蔡志明、立法會議員黃宜弘及梁君彥等政商界名人齊齊去飲喜酒，其中梁君彥仲帶埋愛兒梁宏正及新抱一齊去，相當難得。到賀嘅仲有一班名人二代及青年才俊，包括百仁基金主席施榮忻、菁英會主席白富鴻、莊士集團執行董事莊家彬（Albert）、福建幫頭領楊孫西兒子楊華勇、全國人大常委范徐麗泰兒子范駿華等。
政商界名人雲集，皆因新郎Owen家族背景顯赫，加上佢年輕有為，協助父親打理業務有聲有色。Owen同Alvina相識五年，喺前年嘅九月十六日拍拖，去年九月十六日「跪地」求婚，今年九月十六日結婚，包保唔會忘記呢個日子。新娘Alvina穿上低胸露肩婚紗出場，略帶性感，佢大讚老公靚仔，孝順又細心，至於Owen亦好識做讚老婆滿分，並發表愛的宣言：「永遠對佢好同愛佢！」黃百鳴就對新郎畀足一百分！
聞葉劍波傅明憲講錯嘢
Albert尋日就拉埋緋聞女友傅明憲（GiGi）幫手做兄弟姊妹，咁啱GiGi嘅前夫、前海域集團主席葉劍波捲入一單官司，GiGi被問及事件時顯得緊張，更將結婚講錯成生日。佢話：「今日係Alvina生日，呀唔係！係結婚，所以唔好意思講自己嘢，唔想搶新人風頭。」而Albert就話無留意葉劍波嘅事。至於會否安慰GiGi，Albert就話見到面先至講喇。
卓妮