中環出更：維他奶家族豪捐1.5億撐中大
中大校長沈祖堯上任無耐，尋日開學日就收到一份厚禮，獲維他奶家族豪捐一億五千萬港元，支持大學發展。中大投桃報李，將綜合生物醫學大樓以維他奶集團創辦人羅桂祥命名，尋日舉行大樓奠基，儀式喺地盤舉行，撞啱天氣酷熱，一眾嘉賓熱到汗流浹背。好彩羅家夠細心，即場大派家族旗下嘅維他奶及多款維他飲品，為一眾賓客解渴兼降溫。
望族羅桂祥家族大手筆捐款，羅家上下總動員主持奠基儀式。維他奶國際集團執行主席羅友禮（Winston）聯同兄長羅開敦；三個姐妹羅慕貞、羅慕連及羅慕玲；以及姪仔兼羅桂祥基金主席羅德承（Peter）齊亮相。羅家與中大淵源深，七十年代起已捐不停，但講到一筆過捐一億五咁多，今次就係首次。捐得豪有原因，原來今年係維他奶七十周年，捐錢做善事回饋社會，順便慶祝生日，一舉兩得！
Winston話，希望利用部分捐款，加強對大豆等農產品研究，事關佢爸爸羅桂祥當年發現豆奶營養豐富，因而創立維他奶王國，大豆咁正，好應該再細心鑽研發掘佢嘅好處喎。
阿瑟王自爆飲維他奶大
出席奠基禮嘅前中大校長李國章（阿瑟王）都自爆飲維他奶大，佢回憶五十年代嗰陣，每包只賣毫半子。講番大樓所在嘅靚地，原來多得阿瑟王一手促成。佢話九六年佢以中大校長身份向政府爭取撥地，政府擔心厚此薄彼，唔肯制！阿瑟王提出以中大斜坡換地，結果畀佢傾掂數。以斜坡換地呢招咁奏效，相信唔少大地產商一定牙癢癢！
萬眾期待嘅大樓，總建築面積逾一萬八千平方米，樓高九層，預計施工費達四點五億元，落成後可望令香港科研揭開新一頁。
卓妮