政情：小丁赤裸上身 撐最低工資
臨時最低工資委員會已經定咗首個最低工資喺廿八蚊水平，同勞工界爭取嘅卅三蚊差一大截，令好多打工仔大失所望。以網上短片做宣傳嘅「民間爭取最低工資聯盟」之前搵完周秀娜拍片撐卅三蚊後，吸引不少網民留言討論，聯盟見反應好再拍一段「撐最低工資，撐時薪$33，人人撐！時薪$33！」嘅短片放上YouTube，希望透過短片爭取時薪卅三蚊嘅訴求。
胸前裸背貼33
短片大約四分鐘，今次搵嚟歌手謝安琪御用監製周博賢、球壇名將李健和同平面設計師小丁，宣揚最低工資卅三蚊先可以畀打工仔有一個尊嚴嘅生活。不過，片入面最激就係好鍾意裸體嘅小丁，佢一出場就先除衫，幾乎露點，批評臨資會唔幫打工仔反而幫商界，簡直係荒謬。片尾佢裸體只係喺胸前同裸背貼上33嘅貼紙，大聲呼籲市民支持最低工資有卅三蚊，可以改善貧富懸殊喎。
雖然段片好有噱頭，但觀眾會唔會對支持卅三蚊聽唔入耳，引嚟反效果呢？