政情：橄欖怕同葉準過招
「葉問熱」方興未艾，「橄欖」陳鑑林亦湊熱鬧，喺上周末一連兩日帶團上佛山，去葉問堂學詠春、孔聖園拜孔子，仲請到最近勇奪上海電影節傳媒大獎最佳男配角嘅葉準老師傅隨團，檔次即刻唔同晒。
八十六歲嘅葉師傅一抵佛山梁園，成班慕名前來嘅徒姪徒孫即跪地行禮，似足葉問電影裏面嘅場面。葉師傅乃葉問之子，又係一代詠春宗師。橄欖咁近城隍廟有冇求番支好籤，討教一招半式？橄欖話，有向葉師傅討教詠春……精神，好似中庸之道同強不凌弱咁，但係就無學到拳腳功夫。詠春迷聽到，肯定大嘆橄欖嘥料！
葉師傅憑《葉問前傳》得最佳男配角榮銜，片中內地女星黃奕扮演葉問之妻，而同樣嚟自內地嘅熊黛林亦飾演過呢個角色。團友問葉師傅，兩位女星邊個似佢娘親多啲，葉師傅話係熊黛林。葉師傅強調，黃奕都好靚女，只係熊嘅氣質較似，而且，現實生活中嘅葉媽媽的確係高過葉爸爸嘅。