中環出更：青聯就職禮范駿華秦善文蒲頭
香港青年聯會第十八屆會慶及會董會就職典禮尋晚喺會展舉行，身為青聯主席嘅陳仲尼同常務副主席葉振都同卓妮say咗個hi之後，就忙住滿場飛招呼賓客，事關佢哋尋晚青聯會員加埋賓客有成八百幾人，相當熱鬧。另外，卓妮喺台上發現有一排無見嘅青聯副秘書長范駿華，儀式一完，佢就喺人群中消失咗。
「無緣」同曾智雄做親家
另一個少見咗嘅朋友仲有副主席秦善文，佢大讚四個月大就有十八磅重嘅囡囡好腳頭，事關自從囡囡出世之後，佢生意好到不得了，所以就算要幫手湊女佢都湊得好樂意。佢仲有個兩歲大嘅囝囝，佢大讚囝囝記性好，排英文字母同數目字都無難度，咁啱佢老友記、青聯顧問曾智雄最近都再做爸爸，生咗個囡囡。照計兩家人咁熟，話唔定小朋友青梅竹馬，將來會情投意合，不過秦善文一聽到就話無可能，事關曾智雄係佢個仔嘅契爺，佢亦契咗曾家公主做契女，變相兩個小朋友係兄妹關係，所以都好難做到親家親上加親。對於樓市，佢話佢同天匯已經告一段落，唔想再提，加上佢覺得連政府都叫大家要審慎入巿，所以佢都持觀望態度。
香港青聯每年改選，可以連任一次，所以主席陳仲尼做咗全國青聯副主席，佢喺香港青聯主席之位，冇因為今次改選而改變。
卓妮