中環出更：雷林靜怡湊仔女行超市絕迹Ball場
九巴家族後人雷兆光太太林靜怡（Jane）近半年決心遠離Ball場，一心一意相夫教子，果然講得出做得到，已幾近絕迹Ball場。呢幾日莘莘學子陸續開學，卓妮尋日下午茶時間就喺中環ifc，遇到阿Jane湊住一個仔兩個女及三個工人即一行七人去買餸，期間阿Jane同仔女有講有笑，成個賢妻良母咁，非常溫馨。
尋日下晝三點三，阿Jane先同兩個囡囡及兩個工人坐七人車抵達ifc後，就上咗City'Super超市買餸。卓妮見佢哋推住架車仔四圍穿梭，期間買咗牛扒、乳酪、蔬菜等，無耐另一個工人湊住阿Jane個囝囝嚟到超市會合，然後一齊去買麵包。離開超市後，一家人再到法國殿堂級La Maison Du Chocolat買朱古力。
得午飯時間屬於自己
卓妮上前同阿Jane打招呼，佢三個仔女都好乖好有禮貌識叫人，真係有家教。問阿Jane係咪同仔女準備開學，佢就話啲仔女已經開咗學嘞。阿Jane早前講過，希望盡量少啲去Ball場，多啲時間陪小朋友，想跟貼啲仔女嘅學業成績，果然講得出做得到，卓妮尋日都忍唔住讚佢，佢就笑笑口話：「Ball場就無得去，街市就成日去！」
阿Jane每日都要接送仔女返放學外，閒時又要陪佢哋參加課外活動，每日只有午飯時間係屬於自己嘅，所以佢早前趁仔女仲放緊暑假，約會三五知己去置地廣場Landmark Cafe歎下午茶，又陪朋友到中建大廈地下間世運鐘錶珠寶睇珠寶。不過，呢個暑假阿Jane並無冷落啲仔女，七月初帶咗三個小朋友去新加坡環球影城，玩得好開心。
卓妮