政情：潘佩璆雙喜臨門 十一月大宴親朋
工聯會立法會議員潘佩璆個大新抱有喜，預產期喺下月中，即係話，潘醫生即將「升呢」做爺爺。巧合嘅係，踏入十一月，潘醫生同太太步進結婚三十周年，潘醫生打算結婚紀念同乖孫嘅滿月酒一齊擺，大宴親朋，高興一番。
本身係觀塘聯合醫院精神科顧問醫生嘅潘佩璆，兩個仔已經出晒身，大仔仲就快做爸爸，潘醫生首次做爺爺，近日心情勁緊張，尋日同我哋講，仲緊張過當年做老竇，雖然個孫未出世，但都成日想望吓新抱個肚，為免身懷六甲大肚婆長途跋涉去佢喺粉嶺嘅屋企，依家潘醫生一星期同太太出旺角三、四晚，同阿仔、新抱食晚飯，認真廿四孝老爺。
潘醫生話，一年前大仔結婚時，只係擺咗三十圍酒席，仔大仔世界，當時嘉賓以新人嘅朋友及同事為主，男家親戚唔多。潘醫生話，十一月同太太珍珠婚紀念，一於夾埋乖孫嘅滿月酒嚟大搞，請晒班親戚出席，雙重喜慶，兩份喜悅，諗起都開心！