政情：孫啟烈翻菲醫院舊帳
香港旅行團喺馬尼拉被挾持殺害嘅慘劇，全城不滿菲警拯救不力外，仲勾起港人以往喺菲律賓嘅不愉快回憶。工業總會主席孫啟烈（Cliff）都想起三十幾年前一段往事，佢話當年跟世叔伯去馬尼拉公幹，當時大家正喺酒店大堂等候賓客到來，當世叔伯見到賓客抵達時，就急步出外迎接，但無留意門外有兩級樓梯，於是差錯腳搞到腳部骨折。
Cliff話，世叔伯之後被送往醫院，但醫院竟然要收取二千美元手術費，另額外加多六千美元麻醉費，夾埋八千美元，折合港幣六萬二千四百元，以七十年代嘅物價計算，幾乎買到一層樓，簡直係㩒住嚟搶。不過，Cliff話肉隨砧板上，惟有焗住畀錢，於是即時打長途電話回港叫人籌錢匯過馬尼拉，最後先至搞得掂，呢件事畀佢嘅感覺好差。
對於今次港人遇害慘劇，Cliff感到好震驚，話唔知講乜嘢好。佢話去外地公幹或旅遊，經常會遇到突發事件，呼籲大家萬事要小心。