康泰旅行團喺馬尼拉被槍手挾持殺害，造成八死七傷嘅慘劇，哀傷氣氛至今依然籠罩全香港。中大校長沈祖堯亦悲憤莫名，佢尋日以「從馬尼拉事件看人生」為題，寫咗篇網誌悼念死傷者，仲話今次事件入面，有三位香港英雄人物，令佢印象深刻，肅然起敬。
沈祖堯喺網誌入邊話，當日康泰領隊謝廷駿冒死打電話返香港報告事件，最後被拉到車門鎖上手銬，成為首個遇害港人，謝先生堅守工作崗位，盡忠職守，令人欽佩；為咗阻止槍手殺人，用血肉之軀擋子彈嘅梁錦榮，佢嘅英勇行為同樣令人動容，盡顯父愛嘅偉大；而傅太救咗自己一對子女之餘，仲救埋同團另一個小朋友，佢喺千鈞一髮之際仲能夠表現推己及人嘅精神，實在難能可貴。
曾經喺沙士期間睇住一個個病人倒下嘅沈祖堯，坦言人生嘅意義唔在於生命嘅長短，而係在於生命嘅光芒，所以佢呼籲大家要珍惜生命。佢話喺今次事件入面，大家睇到臨危不亂嘅智慧、對親人嘅愛護、對身邊其他人嘅關懷，沈祖堯向傷者同佢哋嘅親人致以深切慰問，希望佢哋早日從失去親人嘅傷痛中恢復過來，勇敢地、堅強地生活落去。